ബെംഗളൂരു: നഗരത്തിലെ ബസ് സർവീസുകൾ കൂടുതൽ കാര്യക്ഷമവും യാത്രക്കാർക്ക് സൗകര്യപ്രദവുമാക്കുന്നതിനായി പുതിയ സാങ്കേതികവിദ്യ നടപ്പിലാക്കാൻ ബെംഗളൂരു മെട്രോപൊളിറ്റൻ ട്രാൻസ്പോർട്ട് കോർപ്പറേഷൻ (ബിഎംടിസി) ഒരുങ്ങുന്നു. ഇതിന്റെ ഭാഗമായി പരീക്ഷണാടിസ്ഥാനത്തിൽ 30 ബസുകളിൽ ഓട്ടോമാറ്റിക് പാസഞ്ചർ കൗണ്ടിംഗ് (എപിസി) സംവിധാനം സ്ഥാപിക്കുന്നതിനുള്ള നടപടികൾ പുരോഗമിക്കുകയാണ്.
ക്യാമറകൾ സീലിംഗിലും വാതിലുകളിലും
ഏറ്റവും കൂടുതൽ യാത്രക്കാർ സഞ്ചരിക്കുന്ന റൂട്ടുകൾ ഏതെല്ലാമാണ്, ഒരു സമയം ബസിനുള്ളിൽ എത്ര യാത്രക്കാരുണ്ട്, അവർ ടിക്കറ്റുകൾ വാങ്ങിയിട്ടുണ്ടോ എന്നീ വിവരങ്ങൾ കൃത്യമായി നിരീക്ഷിക്കുന്നതിനാണ് എപിസി സംവിധാനം ഏർപ്പെടുത്തുന്നത്. പദ്ധതിയുടെ പരീക്ഷണഘട്ടത്തിൽ തിരഞ്ഞെടുക്കപ്പെട്ട 30 ബസുകളുടെ സീലിംഗിലും യാത്രക്കാർ കയറുകയും ഇറങ്ങുകയും ചെയ്യുന്ന വാതിലുകളിലും പ്രത്യേക ക്യാമറകൾ സ്ഥാപിക്കും. ബസിലേക്ക് പ്രവേശിക്കുന്ന യാത്രക്കാരുടെ എണ്ണം ഈ ക്യാമറകൾ സ്വയമേവ കണക്കാക്കും. ഇലക്ട്രോണിക് ടിക്കറ്റിംഗ് മെഷീൻ (ഇടിഎം) വഴി നൽകിയ ടിക്കറ്റുകളുടെ വിവരങ്ങളും ക്യാമറ നൽകുന്ന യാത്രാക്കാരുടെ എണ്ണവും പരസ്പരം പൊരുത്തപ്പെടുന്നുണ്ടോ എന്ന് പരിശോധിക്കുന്നത് ഇതോടെ എളുപ്പമാകും.
യാത്രാ സൗകര്യങ്ങളും സർവീസുകളും വർധിക്കും
ഏതൊക്കെ ബസ് സ്റ്റോപ്പുകളിൽ നിന്നാണ് കൂടുതൽ ആളുകൾ കയറുന്നത്, ഏത് സമയത്താണ് തിരക്ക് കൂടുതൽ, കൂടുതൽ യാത്രക്കാരുള്ള റൂട്ടുകൾ ഏതെല്ലാം തുടങ്ങിയ സുപ്രധാന വിവരങ്ങൾ ശേഖരിക്കാൻ ഈ പുതിയ സംവിധാനം സഹായിക്കും. ഈ വിവരങ്ങളുടെ അടിസ്ഥാനത്തിൽ ആവശ്യാനുസരണം അധിക ബസ് സർവീസുകൾ അനുവദിക്കാനും യാത്രാ സമയം പുനഃക്രമീകരിക്കാനും അധികൃതർ പദ്ധതിയിടുന്നു. നിലവിൽ 30 ബസുകളിൽ ഈ സംവിധാനം പരീക്ഷണാടിസ്ഥാനത്തിൽ സ്ഥാപിച്ചിട്ടുണ്ടെന്നും, ഇതിൽ നിന്നുള്ള ഫലങ്ങൾ വിലയിരുത്തിയ ശേഷം വരും ദിവസങ്ങളിൽ കൂടുതൽ ബസുകളിലേക്ക് എപിസി സംവിധാനം വ്യാപിപ്പിക്കാൻ കോർപ്പറേഷൻ തീരുമാനിക്കുമെന്നും ഉദ്യോഗസ്ഥർ വ്യക്തമാക്കി.
